A do prekë vala e shtrenjtimit të çmimeve edhe biletat e autobusëve? Shoqata e Transportit Publik thotë se rritja e çmimit të naftës e vështirëson punën në këtë sektor, që ishte dhe ndër më të goditurit për shkak të Pandemisë së Koronavirusit. Për të shmangur rritjen e çmimit të biletave, Shoqata bën disa kërkesa për qeverinë
Kreu i Shoqatës së Transportit Urban dhe Interurban për Veriun, Dashnor Memaj, thotë për Vizion Plus:
“Rritja e çmimit të naftës ka shqetësuar tej mase sektorin tonë, sektori jonë është i varur drejtpërdrejt nga konsumimi i naftës. Jemi sektori i parë që e ndjen rritjen. Kemi bërë disa kërkesa ekonomike. Mbetet një opsion edhe rritja e çmimit të biletave, të paktën për transportin ndërqytetas.Jemi në pritje, kemi dorëzuar para disa ditësh edhe kërkesën e fundit në instancat përkatëse. Jemi në pritje të tyre. Nuk duam të rëndojmë xhepin e qytetarëve, por jemi në mbijetesë ekonomike dhe do të jetë e papërballueshme rritja e çmimit të naftës. Në momentin që nuk merren parasysh kërkesat tona, reduktimi i TVSH në shitje nga 20% në 6% ose heqja e taksës së qarkullimit, jemi të detyruar të mbijetojmë në treg dhe të rrisim çmimet.”
Ai thotë se Shoqata e transportit publik i ka lënë afat qeverisë për një përgjigje. Dhe nëse nuk ka një zgjidhje biletat e autobusit pritet të rriten.
“Ne do t’i presim deri në datën 15 tetor, do të kemi një mbledhje të përgjithshme me të gjithë anëtarët.”
Por në skenarin më të keq, me sa mund të shtrenjtohen? Përfaqësues të Shoqatës thonë se do të shohin ecurinë e përditshme të çmimit të naftës. Por qytetarët ndërkohë thonë se nuk do e përballonin një rritje.
“Nuk e përballojmë dot kaq sa është, jo më të rritet më tepër. Unë vij nga Hasi në Tiranë. E përdorim shpesh, na bie 3-4 herë të bëjmë rrugë. Me kaq sa është, nuk e përballojmë dot. Aktualisht paguaj 7 mijë lekë për person për rrugën nga Hasi në Tiranë”.
