Nga data 11 Tetor, certifikatat e vaksinimit të qytetarëve shqiptarë do të njihen edhe në Britani. Lajmin e ka bërë me dije ambasadori britanik në Tiranë, Alastair King-Smith. Ai ka postuar statusin në rrjetin social Twitter, ku shkruan se ky është një lajm i mirë për shqiptarët, britanikët dhe shtetasit e tjerë që nisen për në Britani nga Shqipëria.
Postimi i plotë:
“Lajm i mirë për shqiptarët, britanikët dhe shtetasit e tjerë që nisen për në Mbretërinë e Bashkuar nga Shqipëria. Nga 11 Tetori, certifikatat e vaksinave të lëshuara në Shqipëri do të njihen edhe në Britaninë e Madhe”.
Të mërkurën e 15 Shtatorit, Komisioni Europian miratoi certifikatën dixhitale të vaksinimit për Shqipërinë dhe 6 vende të tjera jo anëtare të BE. Pas këtij vendimi çdo kush që ka certifikatën evaksinës së miratuar nga EMA mund të lëvizë lirshëm në vendet e Bashkimit Europian.
Ndërkaq, me përditësimin e listës nga Britania, ku qytetarët britanikë lejohen të udhëtojnë, nuk rezulton Shqipëria në listën e kuqe. Janë vetëm shtatë shtete, në të cilat qytetarët britanikë duhet të karantinohen kur të kthehen në shtetin e tyre.
