Duke filluar nga dita e hënë e javës së ardhshme, të gjithë personat që hyjnë në lokalet e Kosovës, do duhet të paraqesin pasaportën e vaksinës. Ky është vendimi që ka marrë Komisioni për Shëndetësinë në Kosovë ndërsa është konfirmuar së fundmi edhe nga ministri i Shëndetësisë së Kosovës, Arben Vitia. Mësohet se rregulli do të jetë në fuqi për të gjitha hapësirat e brendshme të lokaleve deri në shfuqizimin e vendimit të pacaktuar ende.
Kosova shtrëgon kështu masat kufizuese për shkak të pandemisë së koronavirusit. Për personat që nuk kanë certifikatë vaksine, ato duhet të paraqesin testin negativ PCR apo serologjik.
Ministri Vitia ka thënë:
“Në masat që jemi duke hartuar tani edhe në gastronomi të aplikohet nga data 27 shtator të aplikohen masa kufizuese vetëm me certifikatë të vaksinimit, me test PCR dhe me test serologjik. Shoqata e Gastronomeve është treguar bashkëpunuese në këtë drejtim. Me këto shifra, një masë e tillë nuk është më pengesë as për sektorin e gastronomisë”.
Ministri i Kosovës shpreson që të gjejë dakordësi dhe bashkëpunim me pronarët e bizneseve si lokalet për të përmirësuar edhe situatën epidemiologjike në vend. Nga 13 shtatori Kosova ka ashpërsuar masat për shkak të numrit të lartë të të infektuarve dhe humbjes së jetëve për shkak të përhapjes së variantit Delta të virusit.
Kosova ndjek kështu të njëjtën strategji me vendet si Italia, apo Franca.
