Mijëra qytetarë gjermanë, kryesisht të moshuar dhe më të prekshëm ndaj Covid, mund të kenë nevojë të bëjnë vaksinën anti-Covid.
Çfarë ka ndodhur?
Një infermiere dyshohet se u ka injektuar atyre ujë me kripë në vend të dozës së vaksinës anti-Covid.
Si u zbulua?
Autoritetet në veri të Gjermanisë, i referohen një investigimi të policisë, ku dyshohet se infermierja e Kryqit të Kuq mund t’iu ketë injektuar ujë me kripë. Arsyet nuk dihen, ndërsa një këshilltar lokal me emrin Sven Ambrosy, citohet nga The Guardian të ketë thënë: “Jam totalisht i shokuar nga kjo ngjarje”.
Konkretisht:
Autoritetet lokale kanë bërë thirrje që rreth 8,600 banorë mund të jenë prekur nga skema e infermieres dhe për këtë arsye do duhet të rivaksinohen ( këtë radhë me vaksinë anti-Covid).
Fatmirësisht substanca me ujë të kripur nuk është e dëmshme për shëndetin. Dyshohet se injektimet janë bërë mes muajit mars dhe Prill.
Çfarë thonë hetuesit?
“Motivi i infermieres nuk është ende i qartë, por vumë re postimet e saj në rrjetet sociale, ku u shprehte skeptike mbi vaksinat anti-Covid”.
The Guardian shkruan se është ende e paqartë nëse infermierja është arrestuar apo e akuzuar për rastin. Por sipas medias gjermane NDR, janë dorëzuar provat tek një njësi speciale që heton krimet e motivuara edhe politikisht.
