Bllokimet dhe izolimet nuk mund të justifikohen më si një mënyrë për të kontrolluar Covid-in. Britania është rasti kur jeta po vazhdon së bashku me virusin në qarkullim.
Këtë thotë epidemiologu i Kolegjit Universitar në Londër dhe anëtar i SAGE, Andrew Hayward i cili shton se kufizimet e ardhshme për të kontrolluar shpërthimet duhet të “synojnë më të prekshmit”, në vend që të përfshijë kufizime të vendosura për të gjithë, me efektet që mund të jenë shkatërruese në shumë aspekte.
Britania i dha fund kufizimeve muajin e kaluar, ndërsa ditët e fundit masat u lehtësuan edhe në Skoci dhe Uells: Nuk ka më rregull distance apo të tjera.
Kryeministri britanik Boris Johnson deklaroi muajin e kaluar se ishte koha për të mësuar të jetojmë me Covid.
Kjo strategji e epidemiologut mbështetet edhe nga ekspertë të tjerë. Andrew Pollard thotë se të gjithë qytetarët britanikë që nuk kanë simptoma të variantit Delta, apo të varianteve të tjera ë qarkullim, nuk kanë pse të mbëjnë më teste rutinë.
Andrew Pollard i kërkon qeverisë të vërë në zbatim sugjerimin e tij, duke thënë se testi duhet të ofrohet vetëm për ata që po përjetojnë shenja covidi: Nëse vijon të përdoret në masë, do të krijohen përçarje në jetën e përditshme për shkak edhe të izolimit e gjurmimit.
Sipas epidemiologut Hayward vendosja e masave në të gjithë popullsinë për të kontrolluar shpërthimet e reja në vjeshtë nuk do të jetë më i pranueshëm.
Vendimin e Gjermanisë për të hequr testet falas për njerëzit asimptomatikë, profesor Hayward e komenton kështu:
‘Unë mendoj se ndërsa ne përgjithësisht kalojmë në një situatë endemike dhe jo pandemike, dëmi i mundshëm që një virus mund të shkaktojë në një nivel popullsie është më i ulët. Pra, ju nuk mund të justifikoni masa të tilla të gjera të kontrollit në mbarë popullsinë por në vend të kësaj masat e kontrollit duhet të synohen më shumë tek ata që janë më të prekshëm ndaj Covid. Jo vetëm në testime, por në të gjitha llojet e formave të kontrollit, ndërsa kalojmë në një situatë ku do të jetojmë përgjithmonë me këtë virus, atëherë ne synojmë masat tek më të rrezikuarit.’
