25.5 C
Tirana
Tuesday, August 3, 2021
spot_img

A është bërë bota për t’u ‘mbretëruar’ nga burrat?

Nga Ambra Baçuku

‘Lufta’ e grave dhe vajzave për barazi gjinore nisi kohë më parë, kur nuk po kërkonin asgjë më tepër se çfarë meritonin, trajtimin në mënyrë të barabartë dhe jo si skllevër ose si prona. U derdh shumë gjak, u bënë shumë kryengritje dhe u torturuan ndër vite, sa ne mund të dimë vetëm një pjesë të vogël të gjithë mundit të tyre për të qenë ne këtu ku jemi sot. Vajza dhe gra të lira.

Ndër vite beteja vazhdon ende, me gjurmë të vogla por jo të parëndësishme. Një ‘modë‘ e re në vendin tonë së fundmi ose fenomen që duhet të ketë ndezur tashmë çdo kambane alarmi, është vrasja në mënyrë makabre dhe vetëvrasja e çdo gruaje, sa tashmë është kthyer në diçka të zakontë që dëgjohet jo rrallë herë.

Mania për pushtet dhe mbizotërim nuk është diçka e re për burrat ose dhe djemtë. Historia njerëzore ka filluar me mashtrim dhe vrasje, dhe kjo u bë për të sunduar tjetrin, apo për të mbretëruar. Ishte Eva që u ysht nga gjarpri për të kryer mëkatin e fillestarit, dhe Kaimi nuk ishte grua por burrë që vrau Abelin (vëllain), e kështu bota nisi me padrejtësi vetëm për të mbretëruar. Shoqëria njerëzore që atëherë e sot vë në peshore barazinë burrë-grua, e në këto balanca të shprishura kurrë nuk fitoi drejtësia, po forca ose dinakëria.
Që të vegjël vajzave ju mësohet të heshtin, të bëjnë punët e shtëpisë, të mos kundërshtojnë, dhe se janë inferiore ndaj djemve, ndërsa djemve ju mësohet si të jenë ‘bossa‘, si të thonë fjalë të pista, madje ju mësojnë dhe makinën që në moshe fare të vogël se është djalë duhet, djemtë mund të dalin kur të duan, por vajzat jo; ata mund të veshin çfarë të duan, por vajzat jo; ata mund të rrinë me kë të duan, por vajzat me djem jo. Djemve çdo gjë ju njihet si zotësi, ndërsa vajzat paragjykohen edhe për gjëra që nuk kanë asnjë bazë të vërtetë.

‘Vajza lind në shtëpi të huaj e shkon në shtëpi të vet‘, a nuk e kemi dëgjuar rëndom këtë shprehje? Ose ‘kur lind vajze qajnë dhe tërët‘ , pra fatkeqësi e madhe të kesh vajza, ndërkohë që çdo kush nga ne e di që vajza bën më tepër për familjen dhe çdo kënd pranë saj, sepse nga natyra është më sensitive dhe ka instinkt amësor. Që në vegjëli vajzat përgatiten për t’i dërguar në ‘shpi të vet’ , madje që në adoleshencë ju kërkohet të mësojnë punët se në të kundërt ua mëson vjehrra, s’i duron burri, nuk mund të bëhen nena të mira dhe bota do i shajë. Le të qëndrojmë këtu si fillim , vete prindërit ose familjaret i përgatisin në një farë mënyre vajzat e tyre si një produkt nga i cili do të marrin një çmim (vlerësimi në këtë rast), dhe sa me i mirë produkti aq më i lartë çmimi ose në të kundërt do të shahen dhe kësaj i druhen së tepërmi.

Në vendin tonë martesat me shkuesi ekzistojnë ende edhe pse jo në të njëjtën mase si më parë. Familjarët gjithmonë sipas mentalitetit të kalbur mendojnë se ata kanë të drejtë ‘ta shesin produktin e tyre‘ ku ata marrin çmimin më të lartë. Dhe ku jemi sot? Sot ku ndërgjegjësimi po bëhet gjithnjë e më i lartë, vajzat dhe gratë po kundërshtojnë të jenë ‘produkt‘ ose ‘ pronë’ dhe duke mos patur mbështetjen e familjes ose të afërmve pasi nuk pranojnë të prishin imazhin, bëhen viktima të një burri apo djali që është rritur me idenë se ai është mbi çdo gjë e gjithkënd,dhe ego e tij nuk pranon se ka dhe gabime ose askush nuk e ka për detyrë të bëjë çfarë ai do.

Vijmë pas një periudhe pandemie dëgjova të thuhej diku. Në pandemi ishte gjithë bota, por ata u lidhen me njeri-tjetrin më tepër, nuk u vranë. Fakti qe 90 % e agresorëve ishin mbi të 40-at nuk është një rastësi, sepse janë pikërisht ajo grupmoshë që janë rritur me dhunë në familje, ku do rriheshin për gjënë më të vogël dhe ku burri kishte të drejtë absolute të pa kundërshtueshme, dhe në mënyrë instiktive nëse ngrënë zërin ose ushtrojnë forcë, mendojnë se arrijnë çdo gjë.

A kemi përparuar nder vite ? Normalisht që po . Vajzat dhe gratë gëzojnë sot liri, pavarësisht paragjykimeve apo rasteve të tilla, ato mund të shkollohen, mund të punësohen, mund të shprehin mendimin e tyre dhe të marrin vendime për jetën e tyre. Prindërit dhe familjarët janë shume më të ndërgjegjësuar dhe çdo ditë e më tepër po shohim barazi në mes fëmijëve të gjinive të ndryshme.

Gjithmonë kur kemi të bëjmë me raste të tilla, përballemi edhe me shprehje të tipit ‘nuk vret njeri kot‘. Le ta marrim tëe mirëqenë këtë (edhe pse është absurde) ka vajza që pinë duhan, bëjnë tattoo , vishen në mënyrë ekstravagante, apo edhe tradhtojnë, edhe bëjnë ’lojëra të pista‘, mund të jenë edhe përdoruese të lëndëve narkotike , por a nuk i bëjnë edhe djemtë këto? Apo të bëra nga vajzat ose gratë është më rëndë?

Ka dhe vajza ose gra që dhunojnë palën tjetër, e dimë dhe këtë, për të gjithë ata që thonë se po mbivlerësojmë dhe po hedhim baltë, nuk është aspak kështu. Ama janë shumë të rralla rastet që kemi të bëjmë me problematika të tilla, ose në të shumtën e rasteve vijnë si pasoje vetëmbrojtje nga një dhune e vazhdueshme psikologjike apo dhe fizike . Pra negativiteti dhe ‘cthurja’ nuk ka gjini . Ne kete bote nuk ka superioritet asnjë palë, dhe çfarëdo që të bëjë dikush, nuk na jep ne të drejtën ta vrasim e aq më keq ta shtyjmë në vetëvrasje, ka shumë mënyra të tjera për ta larguar nga jeta jonë dhe për të gjetur të drejtën ne mënyrë institucionale.

Ne jemi të ndërtuar të funksionojmë së bashku për t’i ofruar jetës vazhdimësi, janë politika të ndryshme keqdashëse që vendosin ndërmjet nesh një konflikt të tillë, dhe në ‘luftën’ për pushtet burrat dhe djemtë bëhen të verbër dhe të pa mend, ndërsa vajzat dhe gratë plot hile dhe intriga (normalisht jot e gjithë janë kështu) bëhemi armiq të paqenë të njëri-tjetrit. Ne jemi të pa plotë pa gjininë e kundërt dhe sëbashku bëjmë një super fuqi, ndërsa armiq e shuajmë boten.

Gjinia nuk është kriter i përcaktimit të aftësive. Siç ka djem dhe burra shumë të suksesshëm, ka dhe vajza e gra edhe më të arrira. Është e vërtetë që djemtë dhe burrat kanë një force më të madhe fizike, por askush nuk i përballon dhimbjet e lindjes që kalon një nënë për t’i sjellë në jetë. Atyre mund t’ju duket e pamundur që një femër të gjykojë dhe marrë vendime, por në 90% të rasteve femrat janë bërë ‘ shtyllë‘ e shtëpisë dhe kane rritur dhe fëmijët në rastet kur burrat kane patur probleme shëndetësore ose kanë humbur jetën. Por burrat janë martuar me një grua tjetër (flasim për përqindjen më të lartë).

Djemve dhe burrave mund t’ju duket vetja si mburojë ose sikur kanë një përgjegjësi të madhe, ama vajzat dhe gratë kujdesen me instinktin e tyre amësor t’i mbrojnë, të mos i lëndojnë dhe të shërojnë çdo plagë. Pra ka gjëra që djemtë dhe burrat i bëjnë në mënyrë të përkryer, dhe gjëra të cilat i bëjnë femrat shumë herë më mirë. Kombinimi i forcave tona siguron vazhdimësinë e njerëzimit, jo vetëm trashëgiminë me fëmijë, pasi kjo është zgjedhje opsionale që secili e merr në konsiderate siç e shikon të arsyeshme, por kombinimi e njohurive, ndjesive, dhe bashkëveprimi i suksesshëm, sjell një superfuqi dhe produktivitet më të larte në çdo drejtim.

Ne po jetojmë paralelisht në dy botë, atë realen dhe atë të rrjeteve sociale. Duke bërë si moralistë në rrjetet sociale nuk do zgjidhim gjë, as për vajzat dhe gratë e vrara e vetëvrara, dhe as nuk do ‘zgjojmë‘ ndonjë institucion. Para se të ndërmarrim veprime kaq ‘të mëdha’ do ju lutesha të ishim me vigjilent ndaj njerëzve pranë nesh dhe të edukonim me kujdes fëmijët tanë.

Kam vënë re që e kemi shumë të thjeshtë të solidarizohemi me dhimbje mediatike, por pothuajse askush nga ne nuk do denonconte një akt dhune që do shikonte në familje, tek të afërmit , apo komshinjtë në lagje që të mos flasim për më tepër se jemi me mendimin që secili ka jetën e vet, apo në raste kur një fëmijë flet fjalë të pista ose bën gjeste jo të sjellshme gëzohemi, qeshim dhe i japim të kuptojë se ka te drejtë. Do ishte më njerëzore t’i linim statuset moraliste që zgjasin shumë pak orë dhe të fokusohemi ne si fillim tek njerëzit që na rrethojnë, që të përpiqemi të mënjanojmë me aq sa mundemi raste të tilla shokuese, që po e sjellin shoqërinë tonë në një stad ku ka gjithçka po vlerave njerëzore. Para se të bëhemi armiq dhe të luftojmë njëri-tjetrin, le të bëhemi bashkë e të zgjidhim problemet tona, për të ardhmen tonë …

Related Articles

Na ndiqni

4,806FansLike
2,883FollowersFollow
0SubscribersSubscribe
- Advertisement -spot_img

Më të fundit