Autoritetet në shtetin afrikan të Botsvanës prezantuan përpara publikut një diamant gjigant që mendohet të jetë guri i tretë në botë për nga madhësia. Guri i çmuar 1098 karatë u prezantua nga presidenti Mokgweetsi Masisi, një javë pasi ai u gjet nga kompania “Debswana”.
Diamanti është vetëm pak më i lehtë se ai i vendit të dytë, i cili po ashtu u gjet në Botsvana në vitin 2015.
“Ky është diamanti më i madh i gjetur nga “Debswana” në historinë 50-vjeçare të kërkimeve të saj”, tha Lynette Armstrong, një prej drejtueseve të kompanisë.
“Sipas analizave paraprake mendojmë se kemi të bëjmë me gurin e tretë të çmuar më të madh në botë”, shtoi ajo.
Diamanti më i madh në botë është Cullinan, 3.106 karat dhe u zbulua në Afrikën e Jugut. Në vend të dytë është diamanti Lesedi La Rona 1.109 karat i cili ka madhësinë e një topi tenisi dheu zbulua në vitin 2015 në Karowe në veri lindje të Botswana.
