Komiteti Teknik i Ekspertëve vendosi sot lehtësimin e masave. Me heqen e maskave në ambiente të jashtme nga 1 qershori, si dhe shtyrjen e orës policore në 23:00 deri në orën 06:0. Me shifrat në ulje të ndjeshme të infeksioneve si dhe numrave në ulje të viktimave, ku prej dy ditësh raportohen 0 humbje jete, shumë prisnin që ora policore të hiqej dhe të rinjtë tu ktheheshin klubeve të natës. Por sipas vendimit, klubet e natës dhe diskot do të jenë të mbyllura ndërsa muzika do të lejohet deri në orën 22:00.
Zv.ministrja Eugena Tomini e lidhi vendimin me procesin e vaksinimit të të rinjve, të cilëve ende nuk u ka ardhur radha. Në intervistën për Report ajo tha:
Shpresat dhe entuziazmi i përfshirë edhe i popullatës përkundrejt shifrave në trend zbritës bënë që pritshmëritë mund të ishin dhe më të mëdha. Komiteti e ka vëzhguar në mënyrë sistematike situatën dhe kjo situatë mund të vijojë duke respektuar masat, por edhe lehtësimi i tyre të bëhet gradualisht. Ky lehtësim e ka personifikuar ecurinë e masave të marra në vend. Masat merren duke vlerësuar indikatorët. Duhet lënë kohë, fushata po përvijon dhe ndërkohë që grupmosha që frekuenton këto ambiente si diskot dhe klubet, është më e predispozuar të infektohet, sepse fasha e tyre nuk është e favorizuar ende për tu vaksinuar. Prandaj dhe sugjerimi ka qenë që baret e mbrëmjes të vazhdojnë deri në 23:00. Edhe lehtësimi i tyre duhet të jetë i ngadaltë.
Komiteti mori sot edhe një sërë vendimesh të tjera, duke lejuar grumbullimet deri në 50 persona dhe lejimin e tifozëve në stadiume në kapacitetin 30%.
