Që nga mësimi online, mungesa e aktiviteteve kulturore apo sportive janë disa nga arsyet që kanë ndikuar në trasformimin e stilit të jetës së shqiptarëve sipas sociologëve.
“Gjithësecili do të thotë se çfarë ka ndryshuar me ta, duke filluar nga moshat e vogla ku mësimi bëhet në distancë, mungesat e mëdha që po përjetojnë nga takimet me bashkëmoshtarët që janë të rëndësishme për zhvillimin e tyre, nga jeta kulturore e vendit, nga jeta sportive që po ashtu është e kufizuar. Ndryshime ka përjetuar gjithësecili që po kalon shumë orë përmes punëve në distancë ose teknologjisë, të gjitha këto kanë sjellë në njëfarë mënyre një rikonfigurim të jetës shoqërore, në dukje të vogla por kanë prekur thelbësisht jetën e gjithësecilit”, tha sociologia Entela Binjaku.
Periudha 1-vjeçare e pandemisë së Covid-19 ka sjellë ndikim negativ në shëndetin mendor të shoqërisë sonë shprehen mjekët psikiatër.
“Një vit pandemi ndikon në shëndetin e pëgjithshëm, por sidomos në shëndetin mendor, jo vetëm te shqiptarët por në të gjithë botën. Është vënë re një rritje e numrit të rasteve, kjo për arsye se jo vetëm koha është shumë e gjatë, por dinamikat e këtij virusi me ndryshimet e tij, me stresin e krijuar, me çfarë masash ne jemi kufizuar me stresin brenda në familje, jashtë në komunitet, për frikën e infektimit të transmetimit… ”, u shpreh Arjana Rreli, mjeke psikiatre.
Megjithatë covid-19 ka evidentuar dhe një anë tjetër të medaljes në vendin tonë, pasi qytetarët tashmë e pranojnë haptazi kur vuajnë nga ankthi dhe stresi
“Një e mirë e pandemisë ka qenë që është ulur barriera për problematikat e shëndetit mendor sepse tashmë kuptojmë që secili nga ne po vuan pasojat edhe në shëndet mendor, të stresit apo gjendjeve të ankthit. Kështu që kemi shumë më pak komplekse për t’ia treguar njëri-tjetrit dhe për të ndihmuar njëri-tjetrin”, tha Rreli.
