Policia e Shtetit nuk do të tolerojë asnjë tubim që bie ndesh me kornizën aktuale të masave shtrënguese.
Kjo thirrje vjen pas protestave të shënuara ditë e fundit për vrasjen e 25-vjeçarit Klodian Rasha nga një efektiv policise.
Policia iu bën apel qytetarëve që të zbatojnë masat e miratuara nga Komiteti i Ekspertëve dhe urdhrat e Ministrisë së Shëndetësisë.
“Bëjmë apel të mbahen parasysh nga të gjithë, kërkesat e akteve që i përcaktojnë masat shtrënguese për:
Ndalimin e grumbullimeve me më shumë se 10 persona në vende të mbyllura apo të hapura, konferenca, tubime, mbledhje partiake, ceremoni festive etj.
Ruajtjen e distancimit fizik gjatë veprimtarisë së përditshme;
Zbatimin e masave nga administrata publike dhe në automjetet e transportit publik;
Ndalimin e muzikës pas orës 20:00;
Ndalimin e aktivitetit të bareve, lokaleve, restoranteve e ‘fast food’ pas orës 22:00 deri në orën 06:00;
Kufizimin e lëvizjes së popullatës nga ora 22:00 deri në orën 06:00;
Zbatimin e protokolleve në institucionet arsimore, në të cilat vazhdon kryerja e mësimit;
Marrjen e masave administrative dhe atyre penale në rast të shkeljeve dhe mos-zbatimit të masave të veçanta në periudhën e pandemisë së COVID-19.
Në mënyrë që të mos kalojmë në një etapë tjetër të një mbylljeje përtej kufijve të deritanishëm, nga të gjitha institucionet që kanë detyrime, të vazhdohet me seriozitet maksimal zbatimi i Aktit Normativ për zbutjen e efekteve të pandemisë.”
