Nëse deri më sot nuk keni qenë të regjistruar pranë mjekut të familjes ose nëse doni ta ndryshoni atë, tashmë është një procedurë që mund të bëhet vetëm me një klik në e-Albania.
Këto dy shërbime janë shtuar në portalin zyrtar e-Albania. Lajmi është bërë i ditur nga ish- ministri i Shëndetësisë, Ilir Beqaj, i cili tha se është marrë ky vendim pasi ky raporti mes pacientëve dhe mjekut të familjes është shumë i rëndësishëm në këtë kohë pandemie të cilën po jetojmë.
“Mjeku i familjes është çelësi për hyrjen në sistemin e kujdesit shëndetësor publik. Është edhe çelësi për të lëvizuar nëpër hallkat e zinxhirit të këtij sistemi.
Në këtë kohë pandemie është evidente botërisht domosdoshmëria e një marrdhënie sa më të ngushtë me të dhe e një komunikimi të vijueshëm me të.
Për të lehtësuar komunikimin me mjekun e familjes, prej disa ditësh në e-Albania janë disponibël edhe dy shërbime të reja.
Shërbimi i parë, i krijon kujtdo mundësinë të regjistrohet pranë mjekut të familjes nëse deri më sot nuk ka ende mjekun e vet të familjes.
Shërbimi i dytë, i mundëson kujtdo që do të ndryshojë mjekun e tij të familjes ta bëjë këtë veprim on-line pa qënë nevoja të shkojë në qendrën shëndetësore”, shkruan Beqaj.
