Kryetari i Partisë Demokratike, Lulzim Basha ka marrë pjesë në Asamblenë Politike të Partive Popullore Europiane, simotra e PD, e cila ka zhvilluar punimet online. Gjatë fjalës së tij Basha u ka kërkuar ndihmë për të asistuar Shqipërinë me furnizimin me vaksina kundër COVID-19, ndërsa nuk i ndali as aty akuzat ndaj qeverisë se ka keqmenaxhuar situatën e pandemisë dhe nuk ka marrë masat e duhura. Basha pati po ashtu biseda të veçanta me përfaqësues të qeverive të vendeve anëtare të BE, ku kërkoi ndihmë për vaksinën anti-COVID, biseda që sipas PD do të vazhdojnë edhe në ditët në vijim.
“Ndihma e vendeve tuaja me vaksina anti-COVID, në çfarëdo sasie që të jetë, është më se e mirëpritur, dhe ne do t’ju jemi gjithmonë mirënjohës. Vendi im dhe qytetarët e mi, janë në një situatë tejet të vështirë, e cila sa vjen dhe po përkeqësohet. Prandaj, ju lutem na ndihmoni në këto kohë tejet të vështira”, tha Basha.
Në njoftimin e shpërndarë nga PD, thuhet se Basha ka folur për mungesë të stafeve mjekësore, kapacitete spitalore janë ezaurur, ndërsa numri i të infektuarve dhe fataliteteve është rritur.
“Shqipëria është vendi me numrin më të ulët të testimeve, çka e bën të pamundur në një anë identifikimin në kohë të të infektuarve me COVID-19 dhe trajtimin e tyre në mënyrë profesionale, dhe në anën tjetër shkëputjen e zinxhirit të infektimit. Sot, numri i të infektuarve është rritur dhe shtrirë kudo, fatalitetet po ashtu, ndërsa kapacitetet spitalore janë ezauruar. Shqipëria vuan dhe mungesën e stafeve mjekësore, pasi ka numrin më të ulët të mjekëve dhe infermierëve për banor”, u shpreh kryedemokrati.
Akuzat që Lulzim Basha i bën çdo ditë në media ka vendosur t’i çojë edhe në Asamblenë e PPE, edhe pse vetë epidemiologët shprehen se pavarësisht se numri i shtrimeve në spital është rritur ka ende kapacitete spitalore dhe se nuk ka mungesë stafi pasi trajnimet e bluzave të bardha nuk kanë munguar dhe vijojnë ende për të plotësuar çdo boshllëk të mundshëm. Në lidhje me vaksinë, vetë kryeministri Rama u nis një ditë më parë në SHBA ku njoftoi se do të “lëvizte çdo gur që të sillte sa më shpejt vaksinën anti-Covid në Shqipëri”.