Aktori i njohur i humorit, Ermal Mamaqi ishte në një lidhje të drejtpërdrejtë me emisionin “Shqipëria Live” në Top Channel për të folur për artistin e madh, Koço Devole, i cili humbi jetën një ditë më parë.
“Koçon në takimin e parë ka qenë ish-punëtor i Portokallisë. Kur i propozova për filmin kisha ndrojtje, pasi një emblemë si Koço Devole nuk është shaka. Kur u takuam i tregova rolin, skenarin. Më tha në rregull pranoj. Por tha se dua ta shkruaj vetë skenarin. I thashë është shkruar dhe më tha e di, por rolin tim dua ta shkruaj vetë”, tregoi Ermali.
Më pas Mamaqi rrëfeu se si Devole e ndryshoi rolin e tij në “2 gisht mjaltë” nga dy faqe rol në 20 faqe.
“’Roli kryesor jam unë dhe Elvana, ti je baba i rolit kryesor’, i thashë. ‘E di, e di, e kam zhvilluar shumë mirë”, më tha kur erdhi me skenarin e ri me 20 faqe për rolin e tij”, zbuloi Mamaqi.
Sipas Mamaqit, ndërhyrja ishte e jashtëzakonshme dhe e pranuan menjëherë. Madje Ermali tregoi se ai ishte shumë modest dhe e bënte më madhështor atë.
