Presidenti i Kosovës Hashim Thaçi e ka quajtur të pakuptimtë dhe të dështuar dialogun me Serbinë. Zhvillimin e tij në rrethanat aktuale, pa vënien e njohjes reciproke në tavolinën e diskutimit, siç thotë ai i shërben vetëm Serbisë.
“Ky dialog ka vetëm një kuptim, nëse propozimi për njohje reciproke hidhet në tavolinë. Përndryshe është krejt i pakuptimtë, krejt i panevojshëm dhe është i dështuar dhe është në favor të Serbisë, si i tillë që po zhvillohet“, është shprehur ai.
Komente të ngjashme ka bërë të shtunën edhe kreu i Lidhjes Demokratike të Kosovës, Isa Mustafa, i cili ka thënë se dialogu po e humb kuptimin. Mustafa thotë se procesi i dialogut po “shndërrohet në instrument të Serbisë për të blerë kohë, për t’i harruar krimet”.
Qeveria e Kosovës e drejtuar nga Avdullah Hoti, insiston se Kosova bisedon me Serbinë për një marrëveshje finale, e cila do të përfshinte njohjen reciproke.
Dialogu për normalizimin e marrëdhënieve ndërmjet Kosovës dhe Serbisë, me ndërmjetësimin e BE-së, ka nisur më 2011. Por vetëm tani vonë me angazhimin e Shteteve të Bashkuara është arritur normalizimi i marrëdhënieve. Më 4 shtator, Prishtina dhe Beogradi nënshkruan në Shtëpinë e Bardhë marrëveshjen për normalizimin e marrëdhënieve ekonomike.
