Një tragjedi ka ndodhur në familjen Qafleshi nga Dragashi, brenda tri ditësh kjo familje ka humbur dy persona si pasojë e koronavirusit.
Vëllezërit Shemsedin dhe Avdurrahim Qafleshi nuk kanë arritur ta fitojnë betejën me koronavirusin, kështu, njëri ndërroi jetë në moshën 57-vjeçare e tjetri në të 60-at.
Të dy ishin duke u trajtuar në Spitalin Rajonal të Prizrenit.
Kryetari i Dragashit, Shaban Shabani, ka thënë se vdekja e vëllezërve Qafleshi është humbje e madhe.
‘Para 3 ditësh ka ndërruar jetë njëri prej vëllezërve, tani pas dy ditësh vëllai tjetër. Ata ishin duke u trajtuar në Spitalin Rajonal të Prizrenit, fatkeqësisht nuk e kanë përballu luftën me koronavirusin’, tha Shabani.
Ai shtoi se gjendja me koronavirusin në komunën që drejton është e qëndrueshme dhe po bëhet gjithçka për tejkalimin e kësaj situate.
Sipas të dhënave të Institutit Kombëtar të Shëndetësisë Publike, që nga fillimi i pandemisë në Kosovë, numri total i rasteve pozitive është 15 938 dhe numri i të vdekurve nga Covid-19 është 638.
