Mediat kanë publikuar videon e sherrit në Yzberisht të Tiranës, ku një person u konfliktua fillimisht me një çift bashkëshortësh dhe më pas tentoi t’i shtypë me makinë.
Mësohet se sherri mes dy shoferëve ka nisur për një fjalë banale në timon, çka ka bërë që 39-vjeçari Taulant Mekollari të ndjekë nga pas makinën tjetër deri në Yzberisht, ku dhe ka tentuar t’i shtypë burrë e grua, ku kjo e fundit ishte dhe shtatzënë.
Në video shihet momenti kur Taulant Mekollari, i cili rezulton me precedentë penalë në fushën e lojërave të fatit dhe lëndëve narkotike, i jep gaz makinës dhe i afrohet makinës së çiftit për ta përplasur, ndërsa dëgjohen ulërimat e të afërmes së tij, që i del para makinës për ta parandaluar, por fatmirësisht tërhiqet nga një burrë dhe shpëtohet.
Menjëherë, aty afrohen njerëz të tjerë, të cilët e nxjerrin nga makina, ndërsa në moment vijnë edhe disa efektivë policie, që bëjnë arrestimin e 39-vjeçarit. Ndërkohë, me precedentë penalë rezulton edhe shoferi tjetër G. M., për plagosje të rëndë me dashje.
Sherri ka nisur fillimisht me grushte dhe më pas 39-vjeçari ka hipur në makinë dhe iu është drejtuar çiftit për t’i shtypur. Fatmirësisht ngjarja e rëndë, që mund të përfundonte me dy viktima, është parandaluar nga policia.
