Sipas një studimi, pacientët e infektuar nga Covid-19, të cilët kanë probleme me mishrat e dhëmbëve kanë 9 herë më shumë gjasa të vdesin.
Personat që vuajnë nga periodontiti një formë serioze e problemit në lidhje me mishrat e dhëmbëve, kanë më shumë mundësi që të përfundojnë në terapi intensive pas infektimit me koronavirus.
Një nga bashkë autorët e studimit Profesor Lior Shapira, nga Universiteti Hebraik, Izrael tha se: “Rezultatet e studimit sugjerojnë se inflamacionet që ndodhen brenda gojës mund ta hapin derën që virusi të jetë më i dhunshëm. Kujdesi oral duhet të jetë pjesë e rekomandimeve shëndetësore në mënyrë që të zvogëlojmë rrezikun për rezultate akoma më të rënda nga Covid-19”.
Sipas studimit rreth gjysma e popullsisë në botë vuan nga periodontiti, i cili është shkaktari kryesor i ënjtjeve të mishrave të dhëmbëve.
Të dhënat tregojnë se nëse kjo sëmundje nuk trajtohet mund të përhapet në të gjithë trupin dhe të infektojë edhe mushkëritë.
Sipas studiuesve, pacientët me probleme të mishrave të dhëmbëve kishin deri në 3.67 herë mundësi të vuanin nga komplikacione të Covid-19.
