Greqia do të ndalojë për tre muaj të gjitha seancat dëgjimore për azil për emigrantët që mbërrijnë me anije nga Afrika e Veriut. Kështu ka deklaruar kryeministri grek Kyriakos Mitsotakis të mërkurën e 9 korrikut, mes një fluksi të madh migrantësh nga Libia.
“Rruga për në Greqi po mbyllet… çdo emigrant që hyn ilegalisht do të arrestohet dhe ndalohet”, tha kryeministri Mitsotakis në parlament, sipas Barron’s.
Udhëheqësi konservator tha se legjislacioni do të hidhej në votim në sallë të enjten dhe se Athina po e mbante BE-në të informuar për këtë çështje. Përpos kësaj, kryeministri grek tha se edhe nga Brukseli do të kishte shumë shpejt një reagim.
“Më lejoni të bëj disa komente fillestare mbi imigracionin dhe Libinë. Së shpejti do të ketë një reagim nga Brukseli. Megjithatë, do të doja t’ju informoja për disa vendime të marra nga qeveria greke.”, citon gazeta e përditshme greke “Protothema”.
Ky veprim erdhi pasi mbi 2 mijë emigrantë kanë zbarkuar në Kretë, që është një nga destinacionet kryesore të pushimeve në Greqi, si dhe vendlindja e kryeministrit Mitsotakis, duke shkaktuar zemërim midis autoriteteve lokale dhe operatorëve turistikë. Një grup tjetër prej rreth 520 personash u shpëtuan pranë Kretës herët të mërkurën dhe do të ridrejtohen në portin e Lavrio-s në Athinë.
Greqia shpresonte të ndalonte flukset duke kontaktuar autoritetet në Libinë lindore në Bengazi dhe me qeverinë e njohur nga OKB-ja në Tripoli. Por një vizitë e të martës nga komisioneri i BE-së për migracionin dhe ministrat e migracionit të Greqisë, Italisë dhe Maltës pati efekt të kundërt kur zyrtarët vendas e anuluan vizitën.
Kështu, sot Mitsotakis ka thënë se janë marrë këto vendime:
– Pezullimi i shqyrtimit të kërkesave për azil për 3 muaj për ata që mbërrijnë në Greqi nga Afrika e Veriut me anije. Të gjithë emigrantët që hyjnë në vend do të arrestohen dhe ndalohen.
– Krijimi i një strukture të mbyllur të përhershme në Kretë, duke ndaluar ata që hyjnë ilegalisht. Mund të krijohet edhe një strukturë e dytë.
– Diskutimet me Libinë, me qeverinë legjitime të Libisë Perëndimore dhe me atë të Libisë Lindore vazhdojnë. Forcat e Armatosura janë të gatshme të bashkëpunojnë me autoritetet libiane për të parandaluar largimin e anijeve nga bregu libian.
