Danimarka po përgatitet të vendosë rekordin për moshën më të lartë të pensionit në Europë, pasi parlamenti miratoi një ligj të ri që e çon këtë kufi në 70 vjeç.
Me 81 vota pro dhe 21 kundër, ligjvënësit danezë dhanë dritën jeshile për rritjen graduale të moshës së daljes në pension, në përpjekje për të garantuar qëndrueshmërinë e sistemit të mirëqenies në të ardhmen.
Ligji do të zbatohet për të gjithë ata që kanë lindur pas datës 31 dhjetor 1970. Aktualisht, mosha për pensionim varion nga 67 deri në 69 vjeç, në varësi të vitit të lindjes — për shembull, ata të lindur më 1 janar 1967 e tutje e kanë pensionin në moshën 69 vjeç.
Ministrja e Punësimit, Ane Halsboe-Jørgensen, e justifikoi vendimin duke deklaruar se rritja e moshës së pensionit është e domosdoshme për të garantuar mirëqenie të qëndrueshme për brezat e ardhshëm.
