Kryeministri Edi Rama ka komentuar fitoren e Partisë Socialiste në zgjedhjet e 11 majit gjatë një interviste me Richard Attias, organizatorin e Forumit të Investimeve të Ardhshme (FII).
Në bisedë, Rama tha se shpeshherë përballet me pyetje nga kolegët, të cilët shprehen të habitur që një politikan me profil socialist ka fituar katër mandate radhazi.
“Më ka zënë belaja me kolegët që më thonë: Si është e mundur që je socialist dhe ke fituar katër herë? Ndoshta fitoj, sepse nuk jam një socialist i mirë. Tani që flasim, tri gjërat kryesore për ne janë BE-ja, BE-ja, BE-ja. Dritarja e mundësisë është hapur. Është shumë e trishtë që na duhej Putini, që kjo dritare mundësie të hapej, sepse ishte agresioni i tij kundër Ukrainës që i zgjoi të gjithë nga gjumi dhe e ktheu në veprim mesazhin përherë shumë të qartë, por vetëm me fjalë, se një ditë, Europa do të jetë e bashkuar.”
