Pas përpjekjeve për të bllokuar rrjetin social TikTok në Shqipëri, kryeministri Edi Rama duket se ka ndryshuar qasje. Edhe pse kanë kaluar shtatë ditë nga urdhri i AKEP për të ndërprerë aksesin në TikTok, platforma ende funksionon, ndërsa kryeministri ka zbuluar se po zhvillohen negociata me kompaninë për vendosjen e filtrave të sigurisë.
Në rubrikën e tij “Sy m’Sy”, Rama iu përgjigj një komentuesi që e akuzonte për censurë dhe përpjekje për të kontrolluar rrjetet sociale. Kreu i qeverisë tha se qëllimi i tij nuk është mbyllja përfundimtare e platformës, por vendosja e disa filtrave të posaçëm për të garantuar “sigurinë e fëmijëve”, minimizimin e bullizmit, integrimin e gjuhës shqipe dhe promovimin e përmbajtjeve edukative për shkencën dhe argëtimin.
“Nuk është çmenduri por gjëja më e shëndetshme që mund të bëhet. Nuk është se e kemi mbyllur TikTok njëherë e mirë, por po e mbyllim gradualisht. Me kompaninë po punojmë dhe po presim një plan për filtrat që do të vendosen”, u shpreh Rama.
Kujtojmë që të shtunën që lamë pas, opozita zhvilloi një protestë në Tiranë kundër mbylljes së TikTok, duke e cilësuar këtë akt si një përpjekje për censurimin e fjalës së lirë.
