Në Fakultetin e Gjeologjisë dhe Minierave numri i studentëve të regjistruar është vetëm 54. Në këtë fakultet ofrohen tre programe studimi dhe të gjitha janë shpallur si degë prioritare nga qeveria shqiptare.
Si degë prioritare, qeveria ka vendosur t’ju ofrojë të gjithë aplikantëve 40 mijë lekë në muaj.
Por mesa duket qeveria nuk ka bërë llogaritë e duhura sepse, pavarësisht bursës që ofrohet për studentët që zgjedhin të studiojnë në këto degë, interesi nuk është rritur, madje duket të ketë rënë.
Tek Inxhinieria Gjeologjike dhe Burimet Minerare janë regjistruar nga 4 studentë në secilën degë, ndërsa tek Inxhinieri Gjeomjedisi janë vetëm 7 studentë.
Theksojmë se këto janë numra të regjistruar vetëm nga raundi i parë.
Dekani i këtij fakulteti, Vasil Jorgji, ka dhënë një deklaratë gjatë së cilës është shprehur se: “Në tre degët që ofron fakulteti i Gjeologjisë që janë Inxhinieria Gjeologjike, Inxhinieria e Burimeve Minerare dhe Inxhinieri Gjeomjedisi, numri i aplikantëve është më i pakët se numri i kuotave të lira. Ajo që më bën përshtypje është që nuk po shoh efektin e VKM-së që i stimulon, i trajton me bonus studentët që ndjekin degët prioritare.”
Sipas dekanit Jorgji, studentët që regjistrohen në këto programe studimi përfitojnë bursë mujore sa paga minimale. Ndaj ai i apelon aplikantët që të regjistrohen në këto programe studimi.
“Të gjithë ata që do të ndjekin këto degë të fakultetit të Gjeologjisë do të përfitojnë një pagë mujore prej 40 mijë lëkesh të reja pavarësisht mesatares që kërkohej në VKM e vitit të kaluar e cila u rregullua dhe për mua nuk ka ofertë më të mirë se oferta që studenti të vijë këtu edhe të trajtohet, jo që nuk do paguajë tarifë shkollimi por edhe të trajtohet me bonus prej 40 mijë lekësh në muaj që do të thotë se ai mund të përballojë shpenzimet e jetesës në qytetin e Tiranës. Të gjithë studentët që kanë aplikuar janë automatikisht fitues.”
Dekani Jorgji shton se: “Efekti TAP dhe efekti Shpirag e ka bërë të vetën tek Inxhinieria e Naftës dhe e Gazit. Nga 29 vende bosh kanë aplikuar 87 studentë. Do të thotë që ky është program i studimit që është në vend të parë në fakultetin e Gjeologjisë.”
E njëjta gjë është e vlefshme për disa degë të tjera studimi në Universitetin Bujqësor të Tiranës, të cilat mund t’i gjeni lehtësisht në faqen zyrtare të universitetit.
Dhe nëse po mendoni se nuk ia dilni dot sepse nuk ndoshta nuk kemi mesataren e duhur, ju rikujtojmë se qeveria shqiptare e ka hequr kufirin e notës mesatare prej 8.5 për të përfituar mbështetje financiare për ato maturantë që dëshirojnë të studiojnë në programet mësimore të konsideruara prioritet kombëtar.
