Ministria e Arsimit do të rikthejë konkurset për hyrjen në Universitete në vitin e ardhshëm. Lajmi është bërë i ditur nga vetë ministrja e Arsimit, Evis Kushi.
Projekti pilot do të nisë me Universitetin e Mjekësisë. Të gjithë maturantët që synojnë degët e mjekësisë dhe stomatologjisë do t’i nënshtrohen në Tiranë testit elektronik. Ndërsa në vitet në vijim pranimet në universitete do të bëhen të gjitha me konkurse.
“Së bashku me Komitetin e Maturës Shtetërore, mësues dhe drejtues të institucioneve arsimore, për të diskutuar propozimet tona për përmirësimin e procesit të maturës:
Pilotimi i një testi elektronik për maturantët që zgjedhin programin Mjekësi e Përgjithshme, me objektivin që në vitet e ardhshme të mund të shtrihet në të gjitha provimet e maturës.
Shfuqizimi i nenit që ndalon rivlerësimin e testit në Rregulloren e Maturës Shtetërore.
Rankimi i gjimnazeve sipas cilësisë, bazuar në një paketë të re të vlerësimit të jashtëm.
Përmirësimi i vazhdueshëm i procesit të maturës është prioritet për ne, prandaj ky diskutim do të vazhdojë me të gjithë aktorët e sistemit, me qëllim që të marrim vendime sa më të drejta”, tha Evis Kushi.
