Nënvarianti Omicron BA.5 po shqetëson sërish botën dhe po rikthen frikën e pandemisë. Një variant që përhapet shpejt, në mesin e korrikut parashikohet që të jetë piku i infektimeve, referuar Fondacionit Gimbe. Infektimet janë rritur me 58.9% në Itali, në javën midis 15 dhe 20 qershorit. Këtë e ka bërë të ditur Fabrizio Pregliasco, drejtor mjekësor i institutit Galeazzi në Milano, i cili shpjegoi:
“Jemi në mes të valës së re të pandemisë (e gjashta)”. Virologu kërkon gjithashtu vëmendje ndaj qytetarëve të cilët tashmë kanë nisur pushimet verore, ndërkohë që po përhapet nënvarianti më ngjitës nga të gjithë.
“Ne jemi dëshmitarë të një rritje të lartë të rasteve të reja javore – konfirmon Nino Cartabellotta, president i Fondacionit Gimbe – të cilat arrijnë në rreth 255 mijë me një mesatare 7-ditore që tejkalon 36 mijë raste në ditë”.
Për momentin, provat dhe të dhënat konfirmojnë se BA.4 dhe BA.5 janë më pak të ashpër por më ngjitës. Gjithashtu këto lloj virusi kanë një aftësi të madhe për të shmangur mbrojtjen imune nga vaksina dhe infeksioni i mëparshëm, duke rritur mundësinë e riinfeksionit.
