Duke filluar nga viti 2023, shtetasit e mbi 60 vendeve të tjera do të kenë nevojë për një autorizim elektronik udhëtimi për të vizituar pjesën më të madhe të Evropës.
Udhëtarët në çdo vend të zonës Shengen do të duhet të regjistrohen në Sistemin Evropian të Informacionit dhe Autorizimit të Udhëtimit (ETIAS). ETIAS do të jetë i ngjashëm me Sistemin Elektronik për Autorizimin e Udhëtimit (ESTA) i përdorur tashmë në Shtetet e Bashkuara.
Si do të funksionojë?
Procesi do të përfshijë një aplikim të shpejtë në internet dhe një pagesë prej 7,00 €. Sipas Komisionit Evropian, ETIAS nuk është njësoj si një vizë, është më e shpejtë, merret në internet dhe nuk kërkon informacion biometrik.
Udhëtarët brenda vendeve të BE-së janë të përjashtuar dhe kanë lirinë e lëvizjes nëpër bllok, duke i lejuar ata të kalojnë sa kohë që duan në shumë vende.
Por për të gjithë të tjerët që hyjnë në bllok nga një vend që më parë nuk kërkonte vizë, ETIAS do të jetë i detyrueshëm. Lëvizja prek rreth 60 vende, përfshirë SHBA-në dhe Britaninë e Madhe, të cilat humbën lirinë e lëvizjes pas Brexit. Asgjë nuk ndryshon për ata që më parë kishin nevojë për vizë.
Procesi i aplikimit do të jetë nëpërmjet një “sistemi IT kryesisht të automatizuar”, me miratim të dhënë brenda pak minutash, për rreth 95% të aplikantëve. Koha maksimale e nevojshme për miratim mund të jetë deri në një muaj në raste shumë të jashtëzakonshme. Kushdo, aplikimi i të cilit është refuzuar, do të ketë të drejtën e apelimit.
Autorizimi ETIAS është i vlefshëm për një numër të pakufizuar hyrjesh për tre vjet. Aktualisht, shtetasit që nuk janë pjesë e BE-së nuk mund të qëndrojnë më shumë se 90 ditë në vendet e BE-së.
Kostoja: 7 € për ata të moshës nga 18 deri në 70 vjeç. Nuk është ende e qartë nëse të tjerët do të kenë një tarifë të reduktuar ose do të jenë në gjendje të aplikojnë falas. Në krahasim, SHBA tarifon 21 dollarë për një autorizim ESTA. Data e fillimit të aplikimeve nuk është bërë ende e ditur. /CNN/
