Mbajtja e maskave në mjedise të mbyllura është ende detyruese, por në realitet askush s’e respekton këtë urdhër të ministrit të Shëndetësisë, që është në fuqi prej 16 Korrikut të vitit 2020.
Shkollat janë institucione ku përdorimi i maskës është detyrues për mësuesit dhe nxënësit, por nëse qëndron në dyert e tyre, shikon se asnjë nuk ka maskë.
Edhe bizneset lejojnë lirshëm qytetarët të hyjnë dhe dalin pa maska.
Mjetet e transportit publik e kanë gjithashtu me detyrim, por zor se gjen një shofer apo pasagjer me maskë.
Inspektoriati Shëndetësor Shtetëror, si autoritet që monitoron zbatimin e urdhrit të ministrit të Shëndetësisë, bën me dije se në 3 muajt e parë të vitit kanë vendosur vetëm 82 gjoba për mosmbajtje të maskës.
Por edhe pse nga njëra anë urdhri rezulton se shpërfillet prej të gjithëve dhe nga ana tjetër shifrat e infektimeve kanë rënë ndjeshëm, Komiteti i Ekspertëve Teknikë mendon se urdhri për maskat duhet të qëndrojë në fuqi si një masë që në realitet shërben vetëm për vendosjen e disa gjobave sporadike, por jo më për të parandaluar përhapjen e virusit.
