Përmirësimi i situatës në ujëmbledhësin e Fierzës ka vijuar edhe gjatë ditëve të fundit. Si pasojë e reshjeve, por edhe vendimit të Korporatës Elektroenergjetike Shqiptare, për të mos prodhuar energji nga ky hidrocentral, niveli në liqen këtë të enjte ka arritur në 274 metra.
Krahasuar me tre javë më parë niveli në liqen është rritur me afro 15 metra, duke rritur ndjeshëm rezervën ujore dhe energjetike në vendin tonë.
KESH në bazë të rezervave ujore që gjenden në tre hidrocentralet e kaskadës së Drinit llogarit se rezerva energjetike ka arritur në afro 600 GWH.
Por pavarësisht situatës më të mirë krahasuar me pak ditë më parë, autoritetet kanë vendosur të mbajnë ende të fikur turbinat e hidrocentralit të Fierzës me qëllim rritjen e rezervave ujore.
Por largimi i reshjeve ka bërë që niveli i prurjeve në liqenin e Fierzës të pësojë një ulje krahasuar me një javë më parë.
Sipas KESH aktualisht në këtë liqen prurjet llogariten 320 m3/s. Ndërkohë që në liqenin e Komanit prurjet natyrore janë në masën e 100 m3/s, ndërsa niveli i liqenit 171.
Në Vaun e Dejës prurjet janë 10 m3/s dhe niveli ka mbërritur në 7.8 m. Aktualisht prodhimi ditor i energjisë nga Komani dhe Vau i Dejës është 4462 mwh.
