Fillimi i vitit të ri akademik është shtyrë për në 18 tetor pasi nga java 11-18 tetor do të shërbejë për vaksinimin masiv të studentëve. Zëvendës Ministrja e Shëndetësisë Eugena Tomini ka bërë të ditur që do të ketë grupe për vaksinimin në çdo universitet. Gjithashtu Tomini shprehet se do të aplikohen disa vaksina dhe nuk do të fokusohen vetëm tek një.
“Do të jetë një aplikim masiv, me pika vaksinimi në çdo universitet. Kjo do të jetë në mënyrë rotacion, që do të thotë 4-5 fakultete ose universitete do të jenë ditën e hënë, më pas përvijon grafiku. Është një grafik i detajuar ku në varësi të fluksit të studentëve, do të bëhet aplikimi po në ambientet universitare.
Do të ketë variante aplikimi vaksinash. Ne nuk fokusohemi vetëm te një vaksinë, por si është stoku dhe shpërndarja që është kryer nga njësitë vendore të kujdesit shëndetësor, por edhe nga drejtoritë rajonale shëndetësore. Stoku është për të gjitha vaksinat: Pfizer, AstraZeneca, CoronaVac”, ka thënë Tomini.
Sipas udhëzimeve, studentët dhe pedagogët që nuk kanë kryer vaksinën duhet që çdo javë të paraqesin tamponin për të provuar që nuk janë rrezik infektimi për të tjerët.
Media raportojnë se interesi për t’u vaksinuar mbetet në nivele të ulëta. Shumë universitete kanë deklaruar se vetëm rreth 15% e studentëve të vaksinuar.
