Përballë detyrimit për t’u vaksinuar shumë njerëz në Shqipëri, skeptikë ndaj vaksinave, po sigurojnë certifikatën e vaksinimit edhe pa marrë dozat. Doktor Alban Beltoja i ftuar në Java në Dritare, tha se në vendin tonë po falsifikohen edhe përgjigjet e tamponit për të udhëtuar jashtë vendit.
“Ky është absurditet. Në Shqipëri jo vetëm që po blihen certifikatat e vaksinimit, por po falsifikohen edhe përgjigjet e testit antigjenik apo tamponit, për të udhëtuar jashtë vendit. Kjo vë në rrezik të madh udhëtarët e tjerë, që qëndrojnë me orë për orë të tëra me njerëz që janë me Covid.
Kjo është vërejtur në aeroportet e Italisë, ku testet e bëra këtu tregojnë pozitivitet, ndërsa testet e bëra në nisje në Shqipëri, janë negative. Edhe pse ata e dinë që kanë kovid, sërish nisen dhe udhëtojnë duke qenë kështu një burim infeksioni për masën.
Ndaj është e rëndësishme të respektohen masat mbrojtëse nga virusi, edhe nëse je vaksinuar”, u shpreh doktor Beltoja në Dritare TV.
