Dërgesat e emigrantëve në tremujorin e parë të këtij viti kanë arritur në nivelet më të larta të dekadës së fundit, duke vijuar tendencën rritëse të kësaj ndihme që shoqëroi periudhën e pandemisë së Covid-19.
Sipas të dhënave të Bankës së Shqipërisë në tremujorin e parë të këtij viti sasia e remitancave kapi vlerën e 169 milion Eurove, duke u rritur me 17 milion Euro më shumë se në të njëjtën periudhë të një viti më parë dhe 15% më e lartë se mesatarja e kësaj periudhe gjatë viteve të fundit.
Por në kontrast me këtë panoramë, më të frenuara për të sjellë para në Shqipëri paraqiten kompanitë e huaja.
Investimet e huaja direkte u tkurrën me 3 milion Euro krahasuar me një vit më parë dhe me 13 milion kundrejt Dhjetorit të vitit 2020.
Në total investimet e huaja në Shqipëri regjistruan në Janar-Mars vlerën e 229 milion Eurove. Pandemia goditi investimet nga jashtë, duke bërë që fluksi i tyre të arrijë në nivelin e vitit 2016, pas disa viteve rresht që qëndruan mbi vlerën 1 miliard Euro.
