Administrata Tatimore ka hapur zyrtarisht aplikimet për përfitimin e kompensimit për shpenzimet e arsimit të fëmijëve, për të gjithë individët që kanë plotësuar Deklaratën Individuale të të Ardhurave (DIVA) dhe kanë rezultuar me tatim të mbipaguar pas zbritjes së shpenzimeve të lejuara.
Burime nga Administrata Tatimore i bënë të ditur gazetës TemA se aplikimi për rimbursimin e shumës së mbipaguar do të kryhet vetëm online, përmes sistemit e-Filing. Pas paraqitjes së kërkesës, shuma përfituese do të transferohet drejtpërdrejt në llogaritë bankare të deklaruara nga individët aplikues.
Sipas sqarimeve zyrtare, pas plotësimit të DIVA 2025, çdo individ që ka përfituar zbritje të shpenzimeve për fëmijët në vlerë 48 mijë lekë në vit, apo deri në 100 mijë lekë për arsimin, mund të nisë menjëherë procedurën e aplikimit për kompensim.
Si kryhet aplikimi
Procesi realizohet përmes sistemit e-Tax, duke krijuar një çështje të re në modulin e-Filing Im, te seksioni “Çështjet e mia”, ku përzgjidhet opsioni “Pyetje të përgjithshme”. Në formularin përkatës, aplikuesi duhet të paraqesë kërkesën për rimbursimin e tatimit të mbipaguar, sipas shumës së reflektuar në DIVA.
Gjithashtu, aplikimi duhet të shoqërohet me dokumentacionin përkatës në format PDF, si kontratat me institucionet arsimore, faturat e pagesave për shkollim, kurse apo gjuhë të huaja për fëmijët në ngarkim.
Burime nga Tatimet bëjnë me dije për TemA se procedura e plotë e aplikimit do të shoqërohet edhe me një video udhëzuese, për të lehtësuar procesin për qytetarët.
Sa përfitohet nga kompensimi
Vlera e kompensimit ndryshon në varësi të nivelit të të ardhurave dhe numrit të fëmijëve në ngarkim. Për individët me të ardhura mbi 1.2 milionë lekë në vit dhe një fëmijë në ngarkim, kompensimi për arsimin llogaritet rreth 62 euro në vit. Për familjet me të ardhura mbi 2 milionë lekë në vit dhe dy fëmijë nën 18 vjeç, kompensimi arrin rreth 12 mijë lekë.
Ndërkohë, individët që paguhen mbi 200 mijë lekë në muaj dhe tatohen me normën 23%, përfitojnë një kompensim prej 11,040 lekësh për çdo fëmijë. Shuma maksimale e kompensimit, sipas shembujve të publikuar, arrin deri në 250 euro për individët me të ardhura nën 1.2 milionë lekë në vit, që përfitojnë zbritjen maksimale prej 100 mijë lekësh për shpenzimet e arsimit.
Sistemi për plotësimin e DIVA është hapur më 22 janar dhe afati i fundit për deklarimin është 31 mars. Ndërkohë, aplikimi për kompensim mund të bëhet brenda tre muajve nga data e plotësimit të DIVA-s. Vlera e rimbursimit llogaritet automatikisht nga sistemi e-Tax, pas deklarimit të të ardhurave.
