Shtohen rastet e pacientëve me grip. Gjatë 24 orëve në urgjencën pediatrike në QSUT paraqiten rreth 400 pacientë. Por, sipas shefit të shërbimit të urgjencës, Albert Lama, shumica e pacientëve nuk kanë probleme të rënda dhe pas vizitës kthehen në banesë.
“Në urgjencë kemi fluks të shtuar, por duhet të përmendim se shumica e rasteve nuk janë urgjencë, por kanë nevojë për trajtim ambulator, ndërsa 35–40 përqind kanë nevojë për trajtim që hyn në kuadrin e urgjencës apo shtrim në spital”.
Më të prekur janë fëmijët e vegjël, sidomos ata në vitin e parë të jetës. Simptomat e gripit, sipas mjekut pediatër Albert Lama, janë të ndryshme, ku mbizotërojnë kolla dhe temperatura e lartë 39–40 gradë Celsius, ndërsa simptomat mund të zgjasin edhe një javë, në varësi të sistemit imunitar të pacientëve.
“Paraqitjet janë me temperaturë të lartë dhe kollë, probleme me të vjella, diarre. Temperaturat nga infeksionet virale në përgjithësi kanë një lloj rezistence, pasi vetë trupi reagon në mënyrë të tillë duke ngritur temperaturën për t’u mbrojtur nga infeksionet virale. Në kushte shtëpie, temperatura trajtohet duke përdorur paracetamol, ibuprofen, kur e lejon mosha. Mosha e vogël është mosha më e prekur, deri në 4 vjeç”.
Sipas bluzave të bardha, aktiviteti i gripit në vend është në pikun e tij dhe me këto ritme pritet të vijojë edhe në javët në vijim.
