Kompania Meta po përgatitet të bëjë një ndryshim të madh në WhatsApp. Së shpejti, përdoruesit do të mund të dërgojnë dhe të marrin mesazhe edhe nga persona që nuk përdorin WhatsApp, por aplikacione të tjera të komunikimit.
Funksioni i ri, i quajtur “Third-party chats” (Biseda me palë të treta), është aktualisht në fazë testimi në versionin beta të WhatsApp për Android (2.25.33.8).
Ai do të lejojë shkëmbimin e mesazheve, fotove, videove, mesazheve zanore dhe dokumenteve midis WhatsApp-it dhe aplikacioneve të tjera.
Përdoruesit do të mund të zgjedhin nëse duan që këto biseda të shfaqen në listën kryesore të chat-eve apo në një seksion të veçantë me emrin “Third-party chats”.
Për momentin, testimi po bëhet me një aplikacion të quajtur “BirdyChat”.
Megjithatë, disa veçori – si stikerat, statuset dhe mesazhet që zhduken vetë – nuk do të funksionojnë gjatë bisedave ndërmjet aplikacioneve të ndryshme.
Gjithashtu, nëse bllokon një kontakt në WhatsApp, kjo nuk do të thotë domosdoshmërisht se ai s’mund të të kontaktojë nga një aplikacion tjetër; kjo do të varet nga rregullat e vetë aplikacionit tjetër.
Ky ndryshim vjen si pasojë e rregullores “Digital Markets Act” (DMA) të Bashkimit Evropian, e cila kërkon që platformat e mëdha teknologjike të bëjnë të mundur ndërveprimin (interoperabilitetin) mes shërbimeve të tyre dhe atyre konkurrente.
