Më shumë se 7 mijë raste të virusit “chikungunya”, i transmetuar nga pickimi i mushkonjave, janë raportuar në provincën Guangdong të Kinës që nga korriku. Ky alarm ka ngritur në këmbë autoritete, të cilat kanë rikthyer masat e ngjashme me ato të pandemisë së Covid-19.
Qyteti Foshan është më i godituri, ku pacientët janë të detyruar të shtrohen në spital. Ata mund të dalin vetëm pas testit negativ ose pas një qëndrimi njëjavor.
“Chikungunya” shkakton temperaturë të lartë dhe dhimbje të forta në nyje, që në disa raste mund të zgjasin me muaj apo edhe vite. Edhe pse kjo sëmundje është e rrallë në Kinë, ajo është e zakonshme në Azinë Jugore, Azinë Juglindore dhe disa pjesë të Afrikës.
Përveç Foshanit, të paktën 12 qytete të tjera në Guangdong kanë raportuar raste. Vetëm në javën e fundit janë shënuar afro 3 mijë raste të reja. Rasti i parë u raportua edhe në Hong Kong, një djalë 12-vjeçar që kishte udhëtuar në Foshan në korrik.
Virusi nuk transmetohet nga njeriu te njeriu, por vetëm përmes pickimit të mushkonjave të infektuara. Megjithatë, lajmi ka shkaktuar shqetësim te publiku, pasi virusi është pak i njohur në Kinë. “Kjo është e frikshme. Pasojat e zgjatura duken shumë të dhimbshme,” shkroi një përdorues në rrjetin social Ëeibo.
Autoritetet kineze kanë marrë masa të forta për të ndalur përhapjen: qytetarët janë urdhëruar të eliminojnë ujin e ndenjur në shtëpi në vazo, aparate kafeje apo shishe të përdorura me gjoba deri në rreth 1 mijë 400 dollarë.
Në disa zona janë lëshuar mushkonja të mëdha të llojit “elefant”, që ushqehen me mushkonjat përhapëse të virusit, si dhe peshq që hanë larvat e tyre. Në qytetin Foshan, vetëm javën e kaluar, janë lëshuar 5 mijë peshq të tillë në liqenet e qytetit. Dronët përdoren gjithashtu për të identifikuar burime me ujë të ndenjur.
Fillimisht, disa qytete fqinje kërkuan që udhëtarët nga Foshan të karantinoheshin për 14 ditë në shtëpi, por kjo masë është hequr. Disa qytetarë kanë kritikuar këto masa si të ekzagjeruar, duke i krahasuar me kufizimet e rrepta të pandemisë: “Këto ndjesi janë të njohura… Por a janë me të vërtetë të nevojshme?”, shkroi një përdorues në Weibo. Një tjetër komentoi: “Çfarë kuptimi ka karantinimi? Nuk është se të infektuarit do të fillojnë të pickojnë të tjerët.”
“Chikungunya” u identifikua për herë të parë në Tanzani në vitin 1952 dhe prej atëherë është përhapur në më shumë se 110 vende. Simptomat shfaqen zakonisht brenda 3–7 ditësh nga pickimi dhe përfshijnë temperaturë, skuqje, dhimbje në nyje, muskuj dhe kokë. Në shumicën e rasteve, pacientët shërohen brenda një jave, por te disa dhimbjet e nyjeve mund të zgjasin për muaj të tërë. Vdekjet janë të rralla, por grupet më të rrezikuara janë të sapolindurit, të moshuarit dhe ata me sëmundje kronike.
Organizata Botërore e Shëndetësisë thekson se mënyra më efektive për të parandaluar përhapjen është zhdukja e ujërave të ndenjura vendi kryesor i shumimit të mushkonjave.
Ndërkohë, SHBA u ka bërë thirrje qytetarëve të saj që udhëtojnë drejt Kinës të tregojnë kujdes të shtuar pas shpërthimit të virusit.
