Kryeministri Edi Rama ka publikuar një postim në rrjetin e tij social Facebook, përmes të cilit paralajmëron pronarët e lavazheve të vendosura në mes të lagjeve, që lajnë makina në trotuare.
Rama thotë se ata që kanë lavazhe të tilla duhet t’i heqin vetë, në mënyrë që të mos paguajnë gjobën për krim mjedisor.
“Asnjë lavazh nuk do të qëndrojë mes lagjeve për të larë makinat nëpër trotuare, prandaj kush i ka t’i heqë vetë që të mos paguajë edhe gjobën e krimit mjedisor”, shkruan Rama në Facebook.
Prej disa ditësh, po vijon në mbarë vendin lirimi i hapësirave publike, në lagje, në plazhe, anash rrugëve dhe në çdo pjesë të territorit.
Kryeministri Edi Rama ka deklaruar më herët se zaptimi i hapësirave publike është një fenomen i papranueshëm që kthehet në një pamundësi për komunitetin për të pasur një jetë normale.
Kreu i qeverisë shprehet se nisma u ndërmor pas shqetësimeve të ngritura nga vetë komunitetet dhe qytetarët, por kritikuesit pretendojnë se ajo po bëhet në mënyrë selektive.
