Instituti i Gjeoshkencave parashikon një rrezik të lartë për zjarre në pyje këtë fund qershori. Shkak janë temperaturat e larta që pritet të arrijnë deri në 40 gradë Celsius.
Për këtë arsye, Agjencia Kombëtare e Mbrojtjes Civile (AKMC) u ka bërë thirrje qytetarëve të tregojnë kujdes të shtuar. Veçanërisht thirrja vjen për të moshuarit dhe personat me probleme shëndetësore.
“Shmangni qëndrimin në diell gjatë orëve të nxehta dhe tregoni kujdes me përdorimin e zjarrit në ambiente të hapura”, njoftoi AKMC-ja ndërkohë që thekson se respektimi i masave parandaluese shpëton jetët e njerëzve, pronat dhe natyrën.
Po ashtu, AKMC-ja bën thirrje për bashkëpunim dhe në rast të ndonjë zjarri apo tymi qytetarët ta raportojnë në numrin 128 ose 112.
Sipas parashikimit të Institutit të Gjeoshkencave më 24 deri më 27 qershor rreziku për zjarre është më i lartë për Qarkun e Fierit, ndërsa te qarqet e tjera është rrezik i moderuar.
Ndërkohë situata më e rrezikshme parashikohet më 28 dhe 29 qershor pasi rreziku për zjarre mbetet i lartë për nëntë qarqe: Shkodër, Kukës, Lezhë, Durrës, Tiranë, Fier, Vlorë, Berat dhe Gjirokastër.
