Tatimet kanë publikuar një udhëzim të detajuar mbi mënyrën se si qytetarët me të ardhura të ulëta mund të përfitojnë një zbritje deri në 100 mijë lekë për shpenzimet që lidhen me arsimin e fëmijëve.
Ky përfitim bazohet në ligjin nr. 29/2023 dhe është i vlefshëm për individët me të ardhura vjetore të tatueshme deri në 1.2 milionë lekë nga puna ose biznesi. Zbritja aplikohet për çdo familje, pavarësisht numrit të fëmijëve nën moshën 18 vjeç.
Kush e bën kërkesën?
Zbritja deklarohet nga anëtari i familjes me të ardhura më të larta, përmes formularit vjetor të të ardhurave (DIVA), i cili duhet dorëzuar brenda datës 31 mars të vitit pasardhës.
Dokumentet që duhen ruajtur
Qytetarët që kërkojnë këtë lehtësi duhet të kenë të ruajtura kontratat me institucionet arsimore si dhe provat e pagesave për shkollim apo kurse jashtëshkollore (p.sh. gjuhë të huaja). Dokumentet nuk ngarkohen në sistem, por sipas ligjit për procedurat tatimore, duhet të ruhen për të paktën 5 vite.
Shembull praktik
Nëse një qytetar me të ardhura prej 840,000 lekësh në vit aplikon për këtë zbritje, ai mund të përfitojë një shumë rimbursimi rreth 13,000 lekë, e cila mund të kërkohet deri në tre muaj pas dorëzimit të deklaratës.
Kujdes me llogaritjet dhe dokumentet
Sistemi nuk e përllogarit automatikisht këtë përfitim, ndaj individi është përgjegjës për përfshirjen e tij në formularin DIVA. Në rast të një kontrolli nga tatimet, mungesa e dokumentacionit përkatës mund të rezultojë në penalizime.
