Euro e ka nisur sërish javën me rënie në kursin e këmbimit valutor kundrejt lekut, edhe pse tashmë zgjedhjet përfunduan. Javën që i parapriu votimeve, ditën e martë, monedha evropiane ra në nivelin më të ulët historik, duke zbritur edhe poshtë kufirit të 98 lekëve në këmbim, por më pas e rimori veten, duke u ngjitur sërish mbi këtë kuotë.
Por këtë të hënë, ndryshe nga dollari amerikan që është vlerësuar me 0.98 pikë ndaj lekut, si edhe paundit britanik që u vlerësua me 0.61 pikë, Euro e ka nisur me rënie, edhe pse në një vlerë të vogël prej 0.03 pikë ndaj lekut. Vlen të theksohet se përgjatë gjithë vitit 2025, me përjashtim të datës 30 janar, kur arriti në 100.06 lekë, monedha evropiane nuk e ka kaluar asnjëherë atë që cilësohej si “kufiri psikologjik”.
Në këmbimin me lekun, Euro është luhatur në një interval të stabilizuar midis 98-99 lekë, duke paralajmëruar vendosjen e një “qëndrueshmërie të re” në kursin e këmbimit. Në vijimësi, sidomos në vitin 2023, por edhe gjatë vitit 2024, monedha evropiane ka humbur ndjeshëm pikë ndaj lekut. Kjo megjithë operacionet e Bankës së Shqipërisë në tregun valutor duke blerë euro, të cilat kulmuan në afro 1 miliardë euro të blera në vitin 2024.
Sipas ekspertëve të tregut, duket shumë e vështirë që monedha evropiane të rikuperojnë terren, duke u kthyer në nivelet e 120 lekëve, por po ashtu gjasat që ajo të pësojnë ndonjë zhvlerësim të mëtejshëm janë përsëri të vogla, duke krijuar kështu një kurs me luhatje minimale, mes 98-99 lekëve.
