Është hapur thirrja “EIC Pathfinder Open 2025”, ku mund të aplikojnë të gjitha ndërmarrjet e vogla e të mesme, start-up-et, universitetet, qendrat kërkimore dhe Ojf-të. Thirrja ka në fokus teknologjinë e informacionit.
Sipas publikimit të realizuar nga Agjencia Shqiptare e Zhvillimit të Investimeve (AIDA), “EIC Pathfinder 2025” është një instrument financiar në formën e granteve, në kuadër të Horizon Europe që mbështet zhvillimin në fazat e hershme të teknologjive radikale dhe të reja.
Ai synon kërkime vizionare dhe inovacione shkencore me potencial transformues, përmes dy skemave: Pathfinder Open (tematika të hapura) dhe Pathfinder Challenges (sfida të përcaktuara).
Programi mbështet ekipet kërkimore ndërdisiplinore për të zbuluar teknologjitë e së ardhmes dhe për të forcuar pozicionin e Evropës në fushat strategjike.
Ndër objektivat kryesore janë nxitja e kërkimeve të avancuara dhe inovative në teknologji të thella; lehtësimi i zhvillimit të teknologjive për tranzicionin e gjelbër dhe digjital; forcimi i lidershipit evropian në sektorët strategjikë; mbështetja e shkencës me risk të lartë por potencial të lartë, si dhe bashkimi i akademisë, qendrave kërkimore dhe NVM-ve në projekte ndërkombëtare.
Përfituesit do të kenë mundësi financim deri në 3-4 milionë euro për projektet “Open” dhe 4 milionë euro për projektet “Challenges” si dhe mbulim 100% i kostove të pranueshme.
Po kështu, do të kenë qasje në shërbimet e përshpejtimit të biznesit të EIC, mundësi për financime të mëtejshme si “Booster Grants” apo “EIC Transition”, si dhe zhvillimin i teknologjive me ndikim afatgjatë në shoqëri dhe ekonomi.
Sipas dokumentit, do të jenë të pranueshme aplikimet me konsorciume me të paktën 3 entitete nga 3 vende të ndryshme të pranueshme (për Open) dhe entitete individuale (universitete, institute, NVM) mund të aplikojnë në “Challenges”.
Aplikimet e papranueshme përfshijnë propozime pa potencial transformues ose me risk të ulët, si dhe subjekte nga vende jo të lidhura me Horizon Europe.
Afati i aplikimeve është 21 maj 2025 dhe detajet janë të publikuara në faqen e AIDA-s.
