Ministri i Brendshëm, Ervin Hoxha, njoftoi pas mbledhjes së Këshillit të Ministrave se është miratuar shtyrja e afatit të vlefshmërisë për dokumentet e identitetit që skadojnë deri më 11 maj 2025. Ky vendim është marrë në funksion të garantimit të të drejtës së votës për të gjithë qytetarët.
Vendimi vjen pas shqetësimeve të ngritura nga subjektet politike dhe Komisioni Qendror i Zgjedhjeve, të cilët kërkuan që asnjë qytetar të mos pengohet nga dokumentacioni i skaduar për të marrë pjesë në zgjedhjet parlamentare të 11 majit.
“Afati i vlefshmërisë për letërnjoftimet elektronike dhe pasaportat biometrike është shtyrë deri më 31 maj 2025,” tha Hoxha.
