Rihanna padiskutim që di se si t’i surprizojë fansat dhe të tërheqë vëmendje edhe në evente të mëdha ku marrin pjesë qindra të famshëm. Këngëtarja ka zgjedhur gjithmonë që shtatzënitë e saj t’i zbulojë në mënyra mbresëlënëse dhe të veçanta.
Në vitin 2023 ajo zgjodhi Super Bowl për të zbuluar shtatzëninë e saj të dytë, kurse në eventin madhështor të Met Gala 2025 gjeti momentin e përsosur për të treguar barkun e rrumbullakosur. Duke lënë të kuptohet se bebja numër tre është rrugës…
Rihanna dhe partneri i saj A$AP Rocky, të cilët janë prindër të dy djemve, janë në një pritje të ëmbël të fëmijës së tretë. Në tapetin blu këngëtarja u shfaq e veshur me një kostum me vija nga Marc Jacobs, me një kravatë në ngjyrë vishnje me pika të bardha, kombinuar bukur me një kapele të madhe.
