Papa Françesku, i lindur si Jorge Mario Bergoglio më 17 dhjetor 1936 në Buenos Aires të Argjentinës, ishte udhëheqësi i Kishës Katolike dhe i Vatikanit për më shumë se një dekadë.
Ai ishte Papa i parë që vinte nga Amerika Latine dhe i pari jashtë Europës që nga shekulli i 8-të.
Bergoglio vendosi të bëhej prift pasi kaloi një sëmundje të rëndë dhe u bashkua me jezuitët në vitin 1958. U shugurua prift në vitin 1969 dhe më vonë shërbeu si udhëheqës i jezuitëve në Argjentinë. Në vitin 1998 u bë kryepeshkop i Buenos Aires, dhe në vitin 2001, kardinal.
Pas dorëheqjes së Papa Benediktit XVI, ai u zgjodh Papë më 13 mars 2013 dhe mori emrin Françesku, në nder të Shën Françeskut të Asizit – simbol i përulësisë dhe dashurisë për të varfrit.
Gjatë papatit të tij, ai u dallua për thjeshtësinë, përkushtimin ndaj të varfërve dhe thirrjet për drejtësi sociale.
Zgjodhi të jetonte në një bujtinë të thjeshtë dhe jo në apartamentet papale, duke dhënë një shembull përulësie.
Françesku ishte kritik i fortë ndaj padrejtësive ekonomike dhe ndotjes së mjedisit, duke e bërë luftën kundër ndryshimeve klimatike një nga prioritetet e tij.
