Termometrat dhe matësat e vjetër të tensionit me merkur, të cilët shumë prej nesh ende i mbajmë në shtëpi apo që gjenden në spitale dhe qendra shëndetësore, do të dalin jashtë përdorimi deri në fund të vitit 2025.
Shqipëria është angazhuar zyrtarisht për këtë ndryshim, pas nënshkrimit të Konventës së Minamatës, një marrëveshje ndërkombëtare që synon të ndalojë përdorimin e pajisjeve që përmbajnë merkur.
Por pse është kaq e rëndësishme të largohet merkuri?
Ky metal i lëngshëm, edhe në sasi të vogla, është i dëmshëm për shëndetin dhe mjedisin. Ai avullon lehtë, përhapet në ajër dhe mund të grumbullohet në zinxhirin ushqimor, sidomos në organizmat detarë, duke sjellë pasoja të rënda për sigurinë ushqimore dhe shëndetin njerëzor.
Zyra e OBSH në Tiranë po mbështet autoritetet shqiptare në këtë proces, për të garantuar zëvendësimin e këtyre pajisjeve me alternativa më të sigurta dhe më miqësore me mjedisin.
