Fije shumëngjyrëshe, kanavaca, copa për qëndisje, një gjilpërë në dorë, dhe pastaj procesi vijon hap pas hapi. Është kjo mënyra sesi Hera preferon ta kalojë kohën e lirë, duke realizuar qëndisma me motive të ndryshme, panoramike, natyrë, apo portrete.
Të flasësh në ditët e sotme për punimet e dorës ngjan paksa “vintage”, e sidomos në rastin kur ato realizohen nga një vajzë e re, pasi kudo që të hedhësh sytë sheh njerëz me telefona dhe tablet në duar, duke lundruar nëpër internet, dhe duke parë kushedi se çfarë.
Por ndonëse 20 vitet e fundit vëmendja jonë është spostuar disi nga këto lloj punimesh, kohët e fundit duket se interesi ynë është rikthyer pikërisht te këto tradita. Dhe kjo për faktin, se ashtu si Hera, janë edhe shumë vajza e gra të tjera, që kanë zgjedhur të ndjekin këtë pasion dhe traditë, të trashëguar brez pas brezi nga gjyshet tona; por që në ditët e sotme vjen me risi, motive të reja, dhe i pasuruar me elemente të kohës.
Për të mësuar sesi mund të risjellim në përditshmërinë tonë pak nga kultura artizanale shqiptare, Hera na rrëfen diçka nga pasioni i saj.
Kush është Hera’s Art? Dhe pse ke zgjedhur të merresh me këto lloj punimesh?
Hera’s Art është mënyra më e mirë për t’i dhënë emër pasionit tim, punimeve të dorës, kryesisht qendisje, punime me grep, apo rruaza. Këto lloj punimesh deri dje jemi mësuar t’i “identifikojmë” si të nënave dhe gjysheve tona, por tashmë po shihet gjerëssisht që edhe vajza të reja po i dedikohen këtij lloj pasioni. Për mua, kjo është një mënyrë mjaft efikase për të kanalizuar energjitë, duke sjellë në përfundim një produkt që sjell kënaqësi jo vetëm për atë që e realizon, por edhe për të gjithë ata që i shohin këto punime artistike. Për mua gjithçka ka ardhur shumë natyshëm. Që e vogël kam ndjekur me endje mënyrën sesi gjyshja ime, nëna ime, realizonin punime të ndryshme, me teknika të ndryshme, të cilat me shumë kuriozitet jam përpjekur t’i përvetësoj. Prej thuajse 5 vitesh kam filluar ta ndjek më me interes pasionin tim, duke iu përkushtuar në kohën time të lirë, dhe vërtet më ka bërë të ndihëm mirë.
Dhe çfarë domethënie ka të qëndisurit për ty?
Përtej faktit që më përmbush përpos anës profesionale, dhe më bën të ndihem produktive, e shoh si një mënyrë të mirë për të përçuar në brezat e ardhshëm atë që kemi trashëguar nga gjyshet tona. Ndonëse përditshmëria jonë është mbushur me virtualitet, ku të gjithë i sheh duke lundruar në internet, apo duke ndjekur seriale televizive, mendoj se duhet të ketë një “shkundje” nga kjo mënyrë e të shpërdoruarit të kohës, dhe ta përdorim atë me sa më shumë efektivitet.
Ku buron frymëzimi për ty?
Në fakt ky është një pasion i imi. E quaj të tillë, pasi për mua është mënyra më efektive, çlodhëse, dhe inspiruese për të kaluar kohën time të lirë. (Edhe pse nuk kam në dispozicion aq kohë sa do doja). Në fakt, pas shumë orëve të lodhshme në punë, apo stresit të ditës, të qëndisurit e shoh si një formë meditimi. Më ndihmon të shkarkoj energjitë negative, dhe me mbush me ide të reja, ëndrra.
Për shembull cila mund të jetë një prej tyre?
Në fakt është diçka që unë e kam menduar prej kohësh. Bëhet fjalë për një formë të biznesit social. Unë synoj që këto lloj punimesh, të cilat për fat të mirë i realizojnë shumë zonja duararta në Shqipëri, të jenë një ndihmesë për një kategori zonjash të cilat nuk mund të punojnë në ambiente të ndryshme, për shkak të situatave në të cilat mund të ndodhen. Dhe në fakt zgjidhja për këto zonja, mund të jetë të punuarit nga shtëpia. Duke iu siguruar materialet, modelin, këto zonja qofshin kryefamiljare, me aftësi ndryshe, apo edhe në rrethana të tjera të veçanta, të mund të realizojnë punime të kësaj natyre, dhe të përfitojnë të ardhura.
A ka interes për këto lloj punimesh?
Shqiptarët janë një popull që e duan kulturën, traditën. Megjithatë ne ende nuk kemi mundur të gjejmë atë treg, ku këto lloj punimesh të mund të përballojnë një sasi më të madhe produktesh. Aktualisht ne jemi në fazën ku punimet tona, të cilat i realizoj bashkë me dy motrat e mia, i ndajmë me ndjekësit tanë në rrjetet sociale “Hera’s Art – ES handmade” dhe Instagram “Hera Art Qendisje”.
Cilat janë motivet që preferoni?
E gjej veten më tepër tek natyra, peisazhet, objektet historike, portretet. Në fakt mund të them se gjej insipirim në shumë gjëra, si ngjyrat e natyrës,tek lulet, elementet dekorative. Për vetë faktin, se edhe pasi realizohen këto punime, i japin të tjera ngjyra dhe ngrohtësi ambienteve të brendshme.
Si lindi ideja e Hera’s art Qendisje?
Duke qenë se për shumë kohë, punimet e mia i ndaja vetëm me mikeshat e mia, ka qenë shtysa e tyre ajo çka më bëri që të bëj edhe një hap më tej. Përmes profileve në rrjetet sociale, këto lloj punimesh i ndaj me të tjerë, edhe teksa bisedoj me shumë prej tyre, është një kënaqësi e veçantë kur kupton se t’i zgjon tek të tjerët po të njëjtin pasion, teksa shkruajnë “Oh sa bukur, edhe unë kam qendisur si këto”. Dhe në fakt të bashkëndash pasione kaq të bukura edhe me të tjerë, na bën të jemi edhe më socialë, solidarë dhe më bashkëpunues me të tjerët.
