Qeveria shqiptare ka vendosur të heqë përkohësisht vizat për shtetasit e pesë vendeve aziatike, me qëllim nxitjen e turizmit gjatë sezonit veror. Vendimi u miratua sot në mbledhjen e Këshillit të Ministrave dhe hyn në fuqi nga data 15 prill deri më 31 dhjetor 2025.
Shtetasit e vendeve në vijim do të mund të hyjnë në territorin e Shqipërisë vetëm me pasaportë, pa pasur nevojë për vizë:
Arabia Saudite
Katari
Omani
Tajlanda
Indonezia
Në vendim thuhet se masat kanë karakter turistik dhe synojnë lehtësimin e hyrjes së vizitorëve nga Lindja e Mesme dhe Azia e Largët. Për zbatimin e vendimit është ngarkuar Ministria për Evropën dhe Punët e Jashtme.
Ky hap vjen si pjesë e përpjekjeve të qeverisë për të promovuar Shqipërinë si destinacion turistik ndërkombëtar dhe për të ndihmuar zhvillimin e sektorit të turizmit në vend.
