Për të ndihmuar punonjësit të kenë një ekuilibër më të mirë mes punës dhe jetës, një biznesmen kinez ka prezantuar atë që ai e quan një “leje për të pakënaqurit”.
Yu Donglai, themelues dhe kryetar i Pang Dong Lai, një zinxhiri shitjesh me pakicë në provincën Henan të Kinës, njoftoi se punonjësit tani do të kenë të drejtë të aplikojnë për 10 ditë shtesë nga kjo leje sipas nevojës së tyre, raportoi South China Morning Post.
Yu tha, “Unë dua që çdo anëtar i stafit të ketë liri. Të gjithë kanë raste kur nuk janë të lumtur, kështu që nëse nuk jeni të lumtur, mos ejani në punë.”
Ai tha gjithashtu se donte që punonjësit e tij të vendosnin kohën e tyre të pushimit në mënyrë të pavarur dhe gjithashtu donte që ata të kishin një relaksim të bollshëm jashtë punës.
Sipas skemës së re punonjësit mund të mos vijnë në punë nëse nuk ndihen të lumtur. Mungesa në punë për këtë shkak nuk mund të mohohet nga administrata.
Skema e re e pushimeve ka ngjallur bujë në mediat sociale, ku disa përdorues po mbështesin “lejen për mungesë lumturie”. Shumë e kanë vlerësuar Yu si një “bos të mirë”, duke sugjeruar që kjo kulturë e largimit duhet të promovohet në mbarë vendin.
Disa madje po mendojnë të kalojnë në kompaninë e Yu për të ruajtur ekuilibrin e tyre punë-jetë. Sipas një sondazhi mbi ankthin në vendin e punës në Kinë, mbi 65 për qind e klasës punëtore janë ose të lodhur ose të pakënaqur në punë.
Arsyet pas kësaj janë pagat e ulëta, marrëdhëniet e ndërlikuara ndërpersonale dhe lavdërimi i kulturës jashtë orarit. Në një fjalim vitin e kaluar, Yu dënoi këtë kulturë jashtë orarit ku shefat mbrojnë oraret e gjata të punës; ai e quajti këtë praktikë “joetike”.
Si pjesë e politikave të punësimit të Yu, punonjësit do të punojnë vetëm shtatë orë në ditë, për pesë ditë dhe do të kenë fundjavë të lirë. Madje, ata kanë të drejtë edhe për 30 deri në 40 ditë pushim vjetor dhe pesë ditë pushim gjatë Vitit të Ri Hënor.
