Presidenti amerikan Donald Trump ka kërcënuar Europën me tarifa për shkak të industrisë së automjeteve, pasi Europa eksporton më shumë makina në SHBA se sa anasjelltas dhe ka një hendek të madh ekonomik mes tyre.
Në vitin 2022, rreth 700 mijë automjete të reja të prodhuara në Europë me vlerë 36 miliardë Euro u eksportuan në SHBA. Ndërsa nga SHBA-ja në Europë u eksportuan 116,207 mijë makina të reja, me vlerë 5.2 miliardë Euro.
Por përse europianët nuk i blejnë makinat amerikane?
Sipas ekspertëve, shpjegimi është i thjeshtë: Rrugët dhe konsumi.
Analisti i industrisë së automjeteve, Hampus Engellau, thotë për BBC se fuoristradat amerikane janë shumë të mëdha për rrugët europiane. Ai sjell shembullin e Italisë, që ka rrugë të ngushta, sidomos në qytetet e vjetra dhe historike.
“Përpiquni të shkoni në Itali me një fuoristradë të madhe. Unë kam shkuar dhe ishte shumë e vështirë të manovroje”, thotë ai.
Kurse Mike Hawes, Drejtori i Përgjithshëm i Shoqërisë së Prodhuesve dhe Tregtarëve të Automjeteve në Britani të Madhe, e vë theksin te çmimi i karburantit në Europë dhe në SHBA, që në kontinentin e vjetër është dukshëm më i shtrenjtë.
“Ne kemi çmime më të larta të karburantit se amerikanët, kështu që preferojmë automjete më të vogla dhe më ekonomike, kurse amerikanët preferojnë automjete të mëdha”, shprehet ai.
Në SHBA çmimi i karburantit paguhet për gallon, ndërsa në Europë për litër. 1 gallon në SHBA është 3.8 litra dhe diferenca në çmim është e ndjeshme për konsumatorin europian.
