Përveç ID fizike, shqiptarët së shpejti do të kenë edhe ID dixhitale

Së shpejti shqiptarët do të kenë letërnjoftime digjitale me anë të së cilave do mund të marrin të gjitha shërbimet publike.

“Projekti “Identiteti digjital për shtetasit shqiptarë” është një hap drejt modernizimit, integrimit në Bashkimin Evropian dhe përmirësimit të shërbimeve publike. Ky hap do të lehtësojë në mënyrë graduale proceset ekonomike si brenda vendit, por edhe në ato ndërkufitare, duke dhënë impakt pozitiv si për qytetarët, ashtu dhe për ekonominë e vendit”, Ministria e Brendshme.

Pas “dritës jeshile” gjatë konsultimit publik, projektligji “Për letërnjoftimin elektronik të shtetasve shqiptarë” i hartuar nga Ministria e Brendshme ka kaluar tashmë për shqyrtim në Parlament.

“Kjo do të kontribuojë në modernizimin e administratës publike dhe do të lehtësojë aksesin e qytetarëve në shërbime digjitale. Kjo ndërhyrje do të kontribuojë në zhvillimin ekonomik, social dhe institucional të vendit, duke përmirësuar cilësinë e jetës për qytetarët e duke rritur konkurrueshmërinë e Shqipërisë në arenën ndërkombëtare”, thotë Ministria e Brendshme.