Irani lëshoi raketa me rreze të gjatë kundër Izraelit, vetëm disa orë pasi forcat izraelite nisën një ofensivë tokësore në Libanin jugor kundër përfaqësuesit kryesor të Iranit, Hezbollahut.
Qielli i Tel Avivit është mbushur me rakera e dronë vdekjeprurës, të cilat vlerësohen nga eksperët si të një fuqie shumë të fortë.
Në prill Irani lëshoi raketa dhe dronë, por ajo që ndodhi mbrëmë ishtë një eskalim i luftës. Sipas ekspertëve amerikanë, këto raketa hipersonike janë të një shpejtësie të madhe dhe me fuqi shpërthyese të fuqishme dhe përdoren për herë të parë nga Irani, drejt Izraelit.
Sipas Izraelit, shumica e raketave u kapën nga sistemi i mbrojtjes duke u shuar që në ajër.
Sulmi la dy persona të plagosur lehtë në Izrael
‘Shtetet e Bashkuara mbështesin plotësisht, plotësisht, plotësisht Izraelin’, tha të martën Presidenti i SHBA Joe Biden, duke shtuar se diskutimet ishin ‘në vazhdimësi’ me Izraelin për përgjigjen që do të jepej.
Sulmi iranian u denoncua nga Bashkimi Evropian, Franca, Mbretëria e Bashkuar, Japonia dhe Spanja dhe OKB-ja .
Këshilli i Sigurimit do të mblidhet urgjentisht sot, të mërkurën (2 tetor) për të diskutuar përshkallëzimin e armiqësive në Lindjen e Mesme.
Kryeministri i Izraelit, Benjamin Netanjahu tha natën e djeshme se Irani do të pendohej për sulmin.
“Irani ka bërë një gabim të madh sot dhe do të paguajë çmimin. Irani nuk e ka kuptuar akoma vendosmërinë tonë për të mbrojtur veten. Ka njerëz në Teheran që s`e kanë kuptuar këtë. Do ta mësojnë. Do mbrohemi me gjithë çfarë kemi. Kush na sulmon, do të sulmohet”, kërcënoi Netanjahu.
Çfarë është Fattah, raketa balistike supersonike e përdorur nga Irani kundër Izraelit?
Ky model i raketës balistike, i quajtur ‘Fattah’ (fitues), është më i riu në arsenalin e Iranit dhe mund të udhëtojë më shumë se 1400 kilometra, të arrijë një shpejtësi midis 13 dhe 15 Mach (midis 16,000 dhe 18,500 kilometra në orë) dhe mund të anashkalojë ‘ të gjitha sistemet antiraketë,.
Kjo nuk është hera e parë që Izraeli përballet me sulme me raketa balistike nga Teherani. Prillin e kaluar, Irani dërgoi më shumë se njëqind raketa ‘Kheibar Shekan’ (shkelës të fortesës) drejt shtetit hebre, me një rreze veprimi prej 1,450 kilometrash dhe të afta për të mbajtur një ngarkesë prej 1,500 kg, si dhe ‘Ghadr-110’, me një distancë prej 2000 kilometrash dhe një ngarkesë deri në 1000 kg. Termi raketë balistike mund të ngrejë alarmin, pasi kjo lloj pajisje mund të mbajë koka bërthamore nëse është e nevojshme.
Pse e sulmoi Irani, Izraelin?
Irani kërkoi hakmarrje për vdekjen e udhëheqësve të Hamasit dhe Hezbollahut. “Garda Revolucionare”, ushtria ideologjike e Iranit, pretendoi se kishte ‘synuar në zemrën’ e Izraelit, për t’u hakmarrë për vdekjen e liderit të Hezbollahut pro-iranian Hassan Nasrallah, liderit të Hamasit palestinezit Ismail Haniyeh dhe një prej komandantëve të tyre.
