Debatet për ligjin për studentët e Mjekësisë duket se kanë bërë që maturantët ta braktisin atë si degë.
Gjykata Kushtetuese vendosi rrëzimin e pjesshëm të ligjit të miratuar në muajin Korrik 2023 për studentët e mjekësisë, që do t’i detyronte ata të punonin në vend për një minimum prej pesë vitesh, pa të drejtën e diplomimit. Specifikisht, më 25 Janar u shfuqizua detyrimi për punësimin e detyruar në vend për pesë, tre dhe dy vite.
Por kjo nuk ka mjaftuar që maturantët e rinj të zgjedhin mjekësinë si degë studimi.
Një e dhënë interesante del nga konkursi i këtij viti ku vetëm 59% e të regjistruarve kanë marrë pjesë në konkurs.
Në dekadën e fundit më shumë se 3000 mjekë kanë lënë Shqipërinë, kryesisht për Gjermaninë.
Ndërsa sistemi mjekësor në Shqipëri mbetet një nga shërbimet më të debatuata. Rasti i fundit në Onkologjik me skandalin e përgjimeve dhe sesi bëhej pazar me jetën, tronditi opinionin publik, dhe nxori edhe një herë në pah se kanceri kryesor është cilësia e shërbimit tonë shëndetësor.
Braktisja e kësaj dege nga të rinjtë është pa dyshim një lajm i keq.
